سرك ف قلبك سيبته ليه يطلع
و الناس غبية فكروك خاطى
اصبحت خايف م الطريق ترجع
وطيت دماغك ... صرت بتطاطى
مين بس قال لك فيه بشر صافين
و انت اللى ياما اتبهدلت روحك
عاملت ياما و مين غدر على مين
خضرت قلبك .. عيش بقى جروحك
عاتب فى نفسك قول لها كفاية
طيبتك زيادة ... و بالاكيد غلطان
الناس ف وشك تبقى ضحكاية
و ان ديرت ضهرك كلهم شيطان
يا ريت تحاذر من كلام معسول
و حكاوى حلوة بس فيها الموت
اربط لسانك لو لقيته يقول
و خلى بوحك يبقى بس سكوت
ما تقولش سرك الا للمضمون
و اللى ماشيته و شوفت منه الخير
و عرفت انه مهما صار هيصون
و قريت كتابه ... يعنى عنده ضمير
ف الحال تقرر تبقى بير مقفول
و الكلمة تطلع بالحساب و مقاس
ما تقولش هاحكى و عرضها كالطول
و اخلق لبكره من النهاردا اساس
كل اللى عدا يا البرئ انساه
و اياك تعودله ... او تقول ما خلاص
كل اللى عينه بتبكى على ليلاه
فى لسانة شايل الف خزنة رصاص
........
فهمى على نصر