ملام صاحي ...بقلم الشاعرة المبدعة / جهاد زيادة

من كام سنه
رَسَمت عِينيه أحلام
سلَّمت انا للحب تسليم تام
كات عيني سكة سفر
و ايديه معدِّيه
خطيت خطاوي الهوى
خطوات معديه
اتاريه مخبي الألم
كَنُه ميعاد ديه
ف ازاي تكون المفردات عميه
و انا اللي كاتباك ف القصايد نور
و ازاي حروفي من السهر عايمه
و انا اللي كتِّفْت البحور فيا
و انا اللي حلِّفت الليالي تثور
ازاي نهار البعد بيشقشق
و مايتْكسفش من الحنين و يغور
ازاي بشوفك كل يوم ف منام
عمال تطبطب ع الحنان
ف يفور
ازاي تكون الحلم متحقق
عمال تشاغل عيني و ترقق
كل المعاني بعدها و تدور
من كُحْل عيني رَسَمْت سرب حمام
بيطير ينوَّر سكتك قدام
ما منعتش الطيران
الا على جناحي
علمته لما يحن و يناحي
يفرد شراعه
و يمشي ف سكته بسلام
من غير كلام
شايفاك ملام صاحي
رابط سطور المعنى
ف استفهام
انا اللي متشعبطه
على كلمه من بوحك
سحَبت مني الغطا
فبردت انا ف روحك
مليون سلام إتبعت
فارجع لي متكتف
الضحكه ليه عجِّزت
شيبِّتها بنوحك
شِرْبت كاسات الوجع
رجِعْت لي تتطوح
لو كان غرامك سفر
شد الرحال
روَّح

..........

جهاد زيادة