دلوني يا اهل الهوى
من فين أجيب وصفة
الاقي فيها الدوا
و ارتاح ف يوم و اصفى
لو جرحي طـِبّه صعيب
خلـُّوني في رحابكم
جايز بنظرة يطيب
لو دق يوم بابكم
حارضى بمرار صبركم
و لا عمري يوم حاجزع
و مهما اشوف منكم
عن دربكم ما ارجع
تلقاني في الملكوت
بامدح بأشعاري
لحالي يبكي الليل
و حبيبي مش داري
جسمي السليم ابتلى
من حبي انا الجاحد
و فرشت رمل الخلا
و الجفن كان شاهد
و لا نجمة بتواسي
و لا نسمة ترضيني
عايش مع كاسي
فينه اللي شاريني ؟
عزفت لحن الصبا
من كتر بلواتي
حتى زمان الصبا
دايب في أناتي
و الليل يناديني
و بسهدي فيه حيران
مهما النجوم تضحك
بافضل كدا زعلان
لمحت نجم وحيد
ساري غريب في سماه
تايه بفكر شريد
بدره قدر ينساه
و يبني طير الدوح
عـِشـُّه قريب منـِّي
و جاني بسره يبوح
و الدمع في النني
طاير حلاوة روح
و انا فاكره متهني
سألته ليه بتنوح
و الكون حداكو براح ؟!
قال لي : أنا زيـَّك
سابني وليفي و راح
شجري ف ربيعي دبل
و الورد ضاع حسنه
تايه في درب الأمل
عودي انكسر غصنه
باقولها للي عِشِق
و ف نار غرامه انكوى
و خاض في بحر الشوق
فاكر في موجه الدوا
اصبر على بلوتك
و لا تيجي مرة تئنْ
و ارضى بصفا وحدتك
جرح الصبا .. حـَيـْكـِنْ .
ـــــــــــــــــــــ
علي نوح