قوم يا واد الشمس طلعت
و النهار خبَّط علينا
قوم دا قومة بدرى نعمة
كل خير منها يجينا
قوم و صحصح
دا الكسل كله وخايم
شوف ياخويا الواد سامعنى
قال و عامل إنه نايم
كنت افَتَّح عينى دايما ألقى وشك
أحسد النسمة اللى باست يومها خدِّك
كنت اصلِّى تقولِّى حيلك
واحدة واحدة
دانت ما بتلحق تقول كلمة فى سجدة
الشيطان ضاحك عليك
يلا روح المدرسة لـَ يعدِّى وقتك
و انت راجع
إبقى عدى روح لخالتك
و ابقى سلم لى عليها
واوعى تنسى تبوس إيديها
إبقى زور صاحبك مريض
خد جنيه
و اشترى كيس برتقان
أصل صاحبك هو ضهرك
حيطة تتسنِّد عليها
لو يعاديك الزمان
إوعى يوم تغدر بجارك
أصله صاحب عمر ماشى فى مسارك
لما تنزل مصر عدِّى عند خالك
قول ياخال
أمى بتقول لك تعالى
حتى خد لك يوم أجازة
نفسها تشوف العيال
إوعى يوم تنسى البنات
روح و زورهم
جوه دورهم
دا البنات همَّ البدور
من ضياهم
تدخل البهجة قلوبنا
نسمة م الجنَّة و حور
دول ولايا
يا ضنايا
إوعى يوم تإذى قلوبهم
أو تجور
دول هيستنوا قدومك
باشتياق مالى القلوب
اللى تعبانة ساعدها
و الضعيفة خد بإيدها
دا الكفن ماله جيوب
هو دا اللى باقى ليك
إوعى تنسى توِد عمك
أصل عمَّك يعنى ابوك
عمر نفسك تبقى راضية
لو ولادك يوم سابوك ؟؟
روح و قول له زورنا مرَّة
أصل ابويا واحشه صوتك
نفسه تفضل فى عيونه ما تغيب
كنت عارف إنها بتكدب عليَّه
بس كدبة قلب أبيض م الحليب
كله كوم و الأخ كوم
مهما يزعل ولَّا يعتب أو يلوم
إوعى تزعل .. أصله أخ
كلمة بتغطى حياتك
لما لحظة تتوجع بتقولها أخ
لما تنسى و تفتكر بتقولها أخ
لما بتفارق حبيب
لما يغدر بك غريب ..
لما تتكعبل فى فخ
عمره ما ياكلك يا إبنى
حتى لو كنت اليمامة و هوَّ رُخ
يااااااااااااااااااااااه
هو دا اللى ربنا وصى عليه
ياه يا أمى إنتى إيه ؟
انتى فى أعلى المنازل ؟
ولا دا كان وحى نازل ؟
ولا إيه سرِّك يا أمى
كنت باتضايق ساعات
بس وشك بابتسامته
رغم دمعة مدَّارية
رغم فرحة ليه و ليَّا
هو سلطانى اللى آمر
أجرى اطيعك
القى وشك
بالرضا و الفرح عامر
يا سنين الغربة عودى
ياللى حملى فيكى مَيِّل
عودى بيا و رجعينى
نفسى تانى أبقى عيِّل
و تقوليلى
قوم ياواد الشمس طلعت
دا الكسل كله وخايم
شوف ياخويا الواد سامعنى
قال و عامل إنه نايم
........
وليد المليجي