زى العيال تفرحى
با الشتا والتوت
وباحس انك قمر
ولسه بنت بنوت
والشمس ترمى
فى ضيها
من خرم ابره تفوت
تضحك ومن كمها
يطرح شجر وبيوت
تحضن قلوب البشر
وتلف فى الملكوت
اجمل مافيكى الغنا
لو حتى من غير صوت
.............
لمى الحمام م الشتا
فى الغيه يتدفا
اوعى تسيبيه للبوم
يتغدا ويتعشا
والليل غرابه زعق
م الصبح والزفه
محلاكى لما الوجع
بايديكى يتصفى
اجمل مافيكى الأمل
لو حتى بتكفا
والفجر من فرحته
تبت على الدفه
لمى الحمام م الشتا
فى الغيه يتدفا
.................
يام الحكاوى العال
والطرحه فوقها الشال
محلاكى ياعايقه
الصبح نور كحلك
خليكى يوم فايقه
بتهشى فى الدراويش
م الغيه فيطيروا
وتلبسى الطرابيش
عالسنجه والزيروا
لخلق طول عمرهم
مايحسوا ويغيروا
وفايته مين قلبهم
زى الدهب لولى
ماتوا وكان نفسهم
يلاقوكى يوم وسطهم
بتغنى وتقولى
فشافوكى بعد الوجع
بتبيعى فى النوار
حلفوا وبعد الوجع
مايكونوا يوم ثوار
................
هدى جدار الخوف
والسجن والزنازين
تلقى حمامك رجع
والورد فى البساتين
بلاش تسيبى الجدع
وتربى فى التعابين
ماتقولى فين غنوتك
يام العيون قاتلين
وحياة جمال حضرتك
ماتدوسى عا الياسمين
هدى القبور كلها
لسه القبور بالطين
وشدى من قلبها
كل الولاد عايشين
لاضى يوم ينكسر
ولا يبقى م المساجين
عشقك دا زى القدر
واسالى العاشقين
لمى الحمام م الشجر
من سنة السكاكين
تلقى الحمام انتشر
يحرسلك البساتين
ينزل فى وقت الخطر
يرسملك الميادين
لو حتى قلبك حجر
لازم اكيد هيلين