وفات الوقت
بين خوفي وبين خوفك
وبين الوحدة والضيقة
وبين عاذرك
وعارف انها ظروفك
وبين عمري اللي عدي بلاش
كإنه ماجاش
و مش فاكر
فرحت ف يوم ولا دقيقة
واخدني لفين مانيش عارف
وحيد شافك قصادة الحضن
ومركب وسط عمر حزين
وشافك نور لضي الفجر
ونسمة ترد روح الروح
وانا المشتاق
لنظرة حب من عينك
ولمسة من حنان وحنين
وعطر يفوح
وضلاية وضحكاية
وكتف ف نفسه حد يدادي ويطبطب علي جروحة
ويمسح كفه دمع العين
لكن ده فين ؟!!
وانا المظلوم ما بين عاشقين
وانا اللي بنفسى
اخترتك ما بين ملايين
والف يمين
مافيش قبلك سكن قلبي
وانا اللي برغم هذا البعد
باحس بكل احساسك
وانا العاشق لبسمة شمس من ضيك
وانا الناسك
وانا اللي باعيش
عشان خاطرك وعندي يقين
بإنك جنة فوق ارضى
وانفاسي دي انفاسك
وانا اهلك واحبابك
وانا نبضك وانا ناسك
ف نهر هواكي متوضي
وانا اللي بادوق لهيب المر
من بعدك
ودقت الشهد من كاسك
في وقت ما كنت انا جنبك
وكنت بجد حراسك
لكن دلوقت انا تاية ومشتاقلك
واملي ف يوم تزوريني
وحشتيني
باكلم نفسي ف غيابك
واعاتبني واحاسبني
ليه قلبك
يطاوعك مره ويسيبنى !!
وفكر ياخدني ويجيبني
كلام وسكوت
غلطت ف ايه ؟!!
ياريت قلبك يجاوبني
قبل ما اموت !!
.......
أحمد حسن عمر