درويش مسكين
كان ماشي بيدوس على نفسه
وسامع كل كلام الساكتين
كل كلام الجوابات المَرمِّية في صناديق القلب
وناقصاها العناوين
الأم اللي ولادها سابوها وسافروا
يحرتوا في بحور الدنيا
والأب اللي ولاده رموه من سابع قسوة
وقاعد جنب حيطان العمر المهدودة
وحيد.... وحزين
والبنت اللي نسيها الوقت
وفاتها علي محطة أحلامها
والحب عريس الروح في ليالي المنسيين
والبنت اللي اندلقت منها
قزازة الريحة ف عرق الحزن
لما فارقها الجدع الزين
والجدع المسجون في الزحمة
ومش شايف قدامه
كل ما يخرج من زنزانة
تبلعه زنازين
والجدع التاية في الغربة بيسأل ناس تايهين
والوردة اللي اتوأدت حية
وفضلت وردة في قلب الطين
وعمود النور الواقف "غصبن عنه" ينَّور
في طريق الظالمين
ورصيف بيبُص
ويتفرج ع الفقرا اللي بتتفرج ع البتارين
حاول يسمع اكتر يمكن يقدر يعمل حاجة
فاتحول كل كلامهم
لأنين
......
يسري زكي