أصل الجَرَاد عسكر تتار
معجون بنار ......
مسخوط لإنه داس علي عنين النهار
فانكَب منها النور
خَسَفِت إيدين العدل بيه الأرض
عَدَّت على ضهر البسيطة دهور
نَبِّت علي حدود الزمن
من لوح قزاز مكسور
شارب عَكَارة دم مجروح من زمان فإيدين قابيل
أصل الجراد خاين.... عميل
بيلف ويدُور ع الغيطان
ياكل فتافيت الحياة اللي بِتِنزِل في المطر
ويخُش في عضم الشجر
ياكل جنين الضِل
ويلف ويدور ع المدن
يحقنها ضلمة وخوف..... وموت
ويوَزَّع الغُربة على الناس في البيوت
وينَزِّل الأطفال من الحلم اللي شايلهم وطاير للسما
أصل الجراد شَبَه العمى
وانتِ العيون المُلهِمة والحب والصبح المبين
وانتِ البنات الطيبة
بنت الرجال الطيبين
إنت الولد لاخضر وفاس الشقيانين
انت الرغيف الصاحي في بطن العجين
انتِ الحمام فوق المقام
وانت الحمى وشَد اللجام
وانت الوَنَس واللمَْة
والحور اللي نازلة تصلي في سيدنا الحسين
يا كف يوسفنا الأمين
حَوِّشِيلنا من السنين الخضر قمح العرقانين
حوشيلنا من السنين الخرس
صوت زعقة نبي
وشمس وقمر
ونجوم وراه بتقول آمين
............
يسري زكي