تعبت يا رب
مانيش لاقية لطريقي وصول
تعبت وقلبي بيك مشغول
بقيت تايهة
ف دنيا صعبة غدارة
عيوني خلاص
بقت شايفة الخطاوي طشاش
وروحي لابسة نضارة
تعبت يا رب
ف دنيا بتدي للغدار وللقاسي
وعينها عللي بيقاسي
ولا تشوفه
وضارباه ف قلبه ١٠٠شلوت
ولابتفوت
على عيونه
وترمي حتى بس سلام
تعبت يا رب
تعبت يا رب م الأيام ومن لونها
ومن لياليها ونجومها
سمانا يا رب
بقت تشتي عيون غربان
وأرض بوار بتطرح بس من جوفها
قطط تجري وراها فيران
وورد ذليل بتعشق مهجته الأحزان
تعبت يا رب
زرعني الحب ورداية
بتسقي الضلمة نور وعطور
وقصة حلوة وحكاية
بتحكي الحلم وتضمه
وجه سيف الزمن بتار
قصف سن اللسان سمه
صبح حرفه حزين مبتور
تعبت يا رب
وراحتي بين إيديك وحدك
بعيدة عن إيدين مخلوق
أنا ف جاهك أنا ف عرضك
تاخد قلبي لحدة فوق
ماليش غير حضنك انت أمان
تعبت يا رب من ده زمان
تعبت يا رب
...........
منى عبد الرحمن