من ساعة ما عرفتِك
وكإني اتعرفت أخيراً علي شجرة نَبق
وكإني عرفت ف حضن عنيكي آخر شجرة توت
وكإني وَصَلت لحتة ف قلبي ما حَبِتش
ولا كِرهِتش....
ولا عِرفِتش ميلاد ولا موت
من ساعة ما سمِعت الحضرة اللي في صوتك
وانا درويش.........
من ساعة ما شَاهِدت براح المُدن الخضرا في ملكوتك
وانا باصرخ... بشويش
كنت مسَلِّم نفسي للموت
واما عرفتِك قررت أعيش
دلوقت انا عمري مش خمسين ولا حاجة
انا طير وطلعله خمسين عمر وخمسين روح
من تحت الريش
إتأخرت شوية عليكي
وحَصَل فرق ما بيني وبينك في التوقيت
هاستسلم للسما والوقت
وافضل فرحان بوجودِك في العالم
وبروحك في اغاني الست
وليالي ست الحسن ف دنيا الحواديت
وهَالِم الأحلام والحب ف صندوق من فضة
وارمِيه في النيل.......
لما هيوصَل لقلوب الناس الطاهرة
هيبقي بيوت ونخيل
واما هيوصل لعيال نفسها تلعب
كورة ف حتة براح
هيعمل نفسه نجيل
وفإيد البنت اللي بتبكي هيتحَوِّل منديل
وف لحظة حب هيتحول غنوة رومانسية
وف ليل الصيف يتحول نسمة طرية
وفي ليل الصحرا عيون و دليل
وفي ليل الظلم هيعمل ثورة
ويعمل نفسه حجارة تعَوَّر وِش قابيل
واما الليل هيطَوِّل حَبَّة
هيعمل فجر ف نص الليل
ويصلِّي بكل الضُعفا والفقرا
ويفتح قلبه
بعد صلاة الفجر سبيل
......
يسري زكي