انا اللي ف ضحكتي باكي
و ساجن دمعي ف عيوني
و مش ناسي وجع روحي
مراعي خلق عرفوني
و زارع للبشر وردة
و من شوكهم نزف دمى
و لما نفسي يوم ثارت
لقيتني باقول ما تتلمي
بأيد مدودة على طولها
و حضن براح مالوش اخر
و كتف يشيل حمول ياما
و حرف بعقل.. مش ساخر
كتير سكاكين بتطعني
بطبع الغدر ... ببجاحة
و ترجع تاني تقول لي
بتزعل ليه.. ما بالراحة
فأنا هاقفل على نفسي
بيبان كت ديما مفتوحة
مانيش هاسأل على بكره
و انا ايامي مجروحة
...........
فهمي علي نصر