ازاي اكون لك يوم سند
و جراحي منك كلها
قلت الكلام و انا توهت فيه
و حكاوي كنت باعيشلها
واعدت قلبي بيوم فرح
يخطفنا من زحمة حياة
و رسمت لي بكره اللي جاي
مفيهوش دموع و لا حتى اه
صدقت فيك كل اللي كان
و نسيت معاك انا فين و ليه
و مشيت وراك على سكتك
عاشق طريق خطيت عليه
اتاريني موهوم بالهوى
و العشق رغم حاجات كتير
رافع رايات الإمتثال
و رضيت اكون عندك أسير
سامحت فيك كل الخطا
حتى اللي كان من غير سبب
و قبلت انا ف ضلك اعيش
و اسمع كلام ليه العجب
معلش لو طعم الفراق
كان مر و انا منه ارتويت
ماهو من زمان كان مفترض
من يوم ما حسيتك نويت
انا مش هاسامح ضحكتي
و لا هانسي خوف حسيته بيك
القلب مش هيعود برئ
و لا عيني هتحس بعنيك
صدقني... عشقك كان وجع
و الحلم كان ٠٠٠،ثم انتحر
ليلك قتل سحر النهار
ازاي انا شوفتك بشر؟
#فهمي_علي