انا بقى جربت اموت م الخوف
و اضحك على نفسى
و اقول دى ظروف
و اتدارى ف جلدة اى كتاب
و برغم القوة بابان مكتوف
و كمان جربت اعيش اوهام
و اكذب على نفسى و اقول دا سلام
مع انى زمان كان قلبى حديد
و ف حرم الكعبة قدرت اطوف
كان يومها معانا اتنين عواجيز
اتعلقو بيا بشكل لذيذ
حجينا و كانت رحلة تمام
او اجمل جدا م المألوف
مرت ايام و بقيت انا غير
للخوف سلمت بقيت له اسير
و التوهة خدتنى فروحت بعيد
حسيتنى ضعيف و كرهت اشوف
تاه منى طريق الصح ... مشيت
بتمر سنين و انا روحت ... ماجيت
انما على غفلة لقيتنى بافوق
وقتها من نفسى بقيت مكسوف
مكسوف .. ف عيونى دموع جامدين
و وجع و جروح و اهات و انين
و بقيت جوايا بواقى هشيم
متصاب بخرس ... مش لاقى حروف
............
فهمي علي نصر