قلت هاسيب ف عيونك ضحكة
رد العمر و قال لي بلاش
أصلها قافلة عليك السكة
غيرك سبقك.. راح و لا جاش
اعمل نفسك عاشق جدا
و اضحك غش و قول مبسوط
خلي ف قلبك حتة نضيفة
و العب كورة بدون ما تشوط
عد لعشرة و عيد من تاني
و اكذب و أملا الدنيا كلام
حاول لو مزنوق لثواني
اسأل نفسك عايز كام
حسبة تلخبط انك بيها
صبح بييجي و ليل بيفوت
غيرش جنابك عامل فيها
حد بيغلب حتى الموت
و بتستني كتير و دي خيبة
عمرك يا ابني بيلعب بيك
كل سنينك ضاعت منك
احسب تاني الله يخليك
يكفيك ظلم بجد لروحك
اصحى و فوق و اتملي و شوف
عد همومك و اقرا جروحك
و اوعي تقول دي حالات و ظروف
روح لمرايتك شوف مين واقف
قرب منها و حاول تصبر
جوا هناك مخلوق يشبهلك
بس استنى و حاول و اصبر
المخلوق دا زمان كان انت
لما حياته كانت هماه
تاه ف الزحمة و ساب أحلامه
ف ايدين خلق.. ماهيش فهماه
......
فهمي علي نصر