و كإني لسه بابتدي
امشي ف طريق مليان و جع
و الليل مخيم ع الوشوش
و الصبح رافض يستمع
ناس من وشوشهم محزونين
و الهم راكب ضهرهم
صوت الأنين من غير كلام
بيقول كتير عن قهرهم
مش لاقي لون غير السواد
عمال بيكتب ع الحيطان
حكايات بشر مرو هنا
قاسو كتير غدر الزمان
حتى العيال قبل الأوان
بايعين و قصرا حلمهم
لبشر قلوبهم من حديد
شاطرين يمصو ف دمهم
و بنات شعورهم مربوطين
بايشارب لون ظلم السنين
ماشين كأن الخوف طرح
جوا العيون حسرة و انين
ارجع بقى و لا انتظر
جايز يكون ف الدنيا خير
او حد يفتح شنطته
و يكون ماليها حبوب ضمير
انا لسه فيا بصيص امل
ان الحياة هتروق ف يوم
و الصبح رغم انه ف خجل
يعرف اكيد يغسل هموم
و يبص ف عيون الولد
يقرأ اللي فيها بدون كلام
و صبية لحظة تفوت عليه
يرميها بمحبة السلام
يحضن وجع كل البشر
و يحط بسمه ع الوشوش
فتطيب جروح مستعصية
و نعيش فرح ما عرفناهوش
..........
فهمي علي نصر