باتحـــداكى أنـــا جـــــواكى
مهما بعـدتِ بعيد عن عينى
ولاَّ حاولتى إنــــك تنسينــى
أنــا وبجــد يقينــــى مالينى
إنـــك دايمـــاً راح تــلاقينــى
رغم البُعـد باعيش جـــواكى
------------- وباتحداكى-------------
رغم القسوة وبُعـدك عنــى
أنـتِ مسيرك يوم هتحنــى
كـلـمة بأقولهـا وعارف إنــى
مهما حاولتى تخيبى ظنــى
أقــرب مــن رمشــك للننـى
واقرب من نجمِك لسمــاكى
------------- وباتحداكى-------------
مـهـما بحُسنك غيرى تغُــرّى
أنا فى عينيكِ منين ما تمرى
هافضـل كــدا ولآخر عُمـرى
أسمى آيـات الحُب العُـذرى
مهما حاولتى تهونى أمــرى
عينك عارفـة طـريق شباكي
------------- وباتحداكى-------------
رغم دعاوى الإفك الضالــة
من أصحاب السوء والشلة
أنا على شوقك عندى أدلة
تثبت إنى النـــور والضــلــة
وإنك بُـكرا هتنـدهى يا الله
وأنـا هاسمع لك واستنــاكِ
------------- وباتحداكى -------------
مهما تــقولى كتير وتـعانــدى
قلبــك ليا انا بــس لوحـــــدى
مـش هيحب بـشر مـن بعـدى
ولا راح يـشغـــل بالـك قـــدى
يبقى ضــرورى بقدرك ترضـى
وتـسلمــى نـفســك لـقضـاكى
------------- وباتحداكى -------------
ــــــــــــــــــــــــــــــــــــــــــــــــــــــــ
بقلم الشاعر :
أحمد عبد الشافى أحمد