من قلب الجامع والجزمه
ولايمكن اسيب اللى واخدهم
إلا اما يجيب تمن الجزمه
أصل الجزمه بتاعتى متينه
متلصمه على نعل كرب
الفار يدخل مالنحيادى
يخرج مالنحيادى يسب
هيا فقايرى لكن عجبانى
عندى قيمتها بتلاتين جزمه
¤¤¤¤¤
أما الشنطه كانت مقطوعه
مالهاش سوسته عشان تقفلها
كل جيوبها ماهيش ممنوعه
لأى حرامى يعوز ينشلها
متخيطه يجى خمسين مره
ومنسله على طول مالجنب
بادعى يارب انه يصلحها
ويكسب فيها ثواب مش ذنب
ماهى من يوم ما فرمها المترو
وكل شويا نخش ف أزمه
¤¤¤¤¤
أنا باتشفق عاللى سرقنى
أنا متعود عاللى حصلى
لو يعرف حالى هايسبقنى
وهايسبيلى فلوس بعد مااصلى
الجزمه يدوب مالثانويه
يعنى بقالها معايا سنين
فضلت عندى لحد مابقيت
شبه الصندل مالجنيبن
اما الشنطه بكل مافيها
مش هاتجيبلك شاشه بلازمه
¤¤¤¤¤
كل مافيها يدوبك قلمى
على كام ورقه ف قلب ملف
على كام كلمه اكتبهم وارمى
على بكوين مناديل للنف
يعنى ان كنت سرقت الشنطه
إشبع بيها ماتلزمنيش
أما الجزمه اللى انت واخدها
لو غيرى لبسها ماتمشيش
يعنى اللى انت عملته دا كله
من غير عازه ومالهوش لازمه
¤¤¤¤¤
بس غريبه انك فى الجامع
وبتسرق مش همك حاجه
هوا انت مافيش خشا ولا مانع
ولا انت مفكرها سذاجه
وصلت بيك الجرأه بتسرق
من بيت ربك حد راكعله
مهما تفكر مثلا انك
كلك ايه غير عبد راجعله
توب وارجعله وحاسب نفسك
بس أمانه تجيب الجزمه
¤¤¤¤¤
الشنطه اتسرقت واتخدت
من قلب الجامع والجزمه
................
وليد المصرى