يا شعر عاجبك كده
زعلت ناس مني
شمّت فيا العدا
بعدوا كتير عني
عتاب محبة اتقلب
لعتاب زعل وخصام
حاجة وليها العجب
أنا بس ليه اتلام ؟
علشان بحب الشعر
ودافعت انا عنه ..
الشعرا عملوا الصح
وسمعت أحلى كلام .
قالوا قليل الأدب
قالوا كمان سافل
ماعرفش أيه السبب
وصفوني بالجاهل
علشان دافعت عليه
ونصفته في قصيدة
قالوا البعيد اتهبل
تفتكروا أستاهل ؟؟
دايما" هاقول الحق
مش احابي ولا اجامل
لو أرض بيك تتشق
ع الشعر ما اتحامل
ده الشعر لو ينطق
كان وطى باس إيدنا
علشان نبطل شعر
كان انتحر أو طق
قبل اما تكتب شعر
يا صاحبي إتعلم
مش عيب تكون مستمع
وسطينا تتعلم
للشعر لو تستمع
أحسن ما تتكلم
هاتحس نجمك عليّ
تصبح بقى معلم .
أحسن ما كل الناس
تسمع وتتريق
وتقول عليك هلاس
وكلامه متلزق
بيقول كلام وخلاص
وف شعره بيحمرق .
وانتي يا ست الناس
الشعر مش طابخة
مش كوسة مش قلقاس
بامية تكون صابحة
نقي كلام معقوول
في كل سطر وبيت
ياتقولي شيء مقبول
أو تقعدي في البيت
بزيادة لت وعجن
أرجوكي مش ناقصة .
يا شعرا يا شاعرات
مدوا الإيدين مدوا
عايزين إيدين للشعر
يبنوا ولا يهدوا
رجالة أو ستات
للكلمة بيسدوا
دي نصيحة مني أنا
شاعر على قدوا
دي نصيحة مني أنا
شاعر على قدوا
-----------------------
محمود السيد