وبعد دراسة الواقع
وبعد قراءة الأشواق
انا قررت تحويلك لقلبى
وليرى ما شاء
يحبك او يموت فيكى
يداويكى يعاديكى
يقضى العمر مستنى ورا عنيكى
خلاص صبح القرار عنده
وهوه الآمر الناهى
وهوه صاحب الإمضاء
وانا.....؟ مالى
ماليش دعوة ولا ليا مقام محفوظ
ولا دعوة بتوصل ربك المحظوظ
وواقف بينى وما بينه عدد وعتاد
ومتهم ان انا واقف فى وش الشمس
واللى ورايا ده خيالى
أنا مستنى طوالى
وواقف ليا بالمرصاد
جبان ماسك سلاح آلى
ميعرفشى ان انا غالى
ودى أرضى وده عرضى وده حالى ومحتالى
وده مالى
لكن من أصل أخلاقى
انا بطلت اتدخل ف أشيائى
انا اللى تعبت واتبهدلت واستبدلت أعضائى
عشان افهم باحبك ليه
دفعت ضرايب الداية
وحداية بتخطفنى كأنى لقيط
انا يا أمى مش لقيانى جنب الحيط
وليا حقوق ومش عاوز سوى بسمة
سوى نظرة
ومش عاوز على إسمى أشوف شخابيط
انا فى الحب طلبى بسيط
ونفسى اعرف باحبك ليه
وليه عاشق تراب رجلك
وليه همك بقى دائى
ومع ذلك ولا فاهم ولا عارف
وتوهت كمان ف أنحائى
ومش طايل كلام احكية
هاقول لك ايه واعيد لك ايه
اكيد فيه حاجة مغلوطة
وتركيبتى كانت ناقصة شوية نور صغنطوطه
مادام انتى ما بتشوفينيش
أكيد فيه حاجة مخلوطة ماهيش ظاهرة
لافى عيونى ولا ف لونى ولا حتى عليها دليل همايونى
لاانا مصرى ولا قبطى ولا مسلم ولا من أصل فرعونى
وانا ابن الكلب ف عيونك مادام انتى ما بتبوصيش
هاقول لك ايه
زهقت كلام
دانا دوبت شعرى فيكى والأحلام
انا ما بقيتش عارف انام
خلاص وقفت أفكارى
انا اللى اليأس مش كارى
نزعت السارى من عمرى
ولا عاوز ولا فرحة ولا أحزان
ولا عاوز عسل منك ولا بدنجان
خلاص مش ناوى أرفع فيكى تانى آدان
وخليكى على دينك
وقضيها ركوع ف ركوع
صلاتك وقتها ممنوع
صلاتك كل مافيها يودى النار
صلاتك ناقصة لشهادة وسجادة
وناقصة الفاتحة كالعادة وناقصة وضوء
وناقصة إمام يكون مخلوق
يقول يارب انا عبدك ومش زيك
أنا إنسااااااااااااااااااان
بقى عندى العمى ألوان
ولا شايف ولا أحمر ولا أبيض ولا إسود
انا بطلت ارد سلام
ومش عاوز أمل منك ولا أوهام
زهقت كلام.....كفاية حرام
خدعتينى وفرجتى عليا الخلق
سيبتى الدم بقى أنهار
وسيبتى التار
وسمعتى البعيد والجار
وبيقولوا دا مات كداب
انا اللى حافظت على عرضك
وهما بيخلطوا الأنساب
انا اللى وقفت ارحب بالفنا فيكى
وانا اللى قابلت وفد الموت على الأعتاب
وعمرى مره ما سألتك
ومتشعلق فى سقالتك
أبيّض وشك المليان دخان وتراب
انا كداب ؟
دليل الصدق كان دمى
لكن واضح بإنك بس بتسمى على الأحباب
وانا كداب
ياستى ربنا يهنى سعيد الحظ بسعيدة
ومش عاوز رطب منك ولا جريدة
انا بطلت شوقى خلاص
ومش هاحرق فى أعصابى
ولا هتطولى تنهيدة
ومش مستنى اشوف شمسك
ولا عاوز سنه جديدة
وبكرة تقولى كان راجل وكان ابنى وتتباهى
ووالله ووالله ووالله تلاته يمين
لتعرفى قيمتى وتقولى أجيبه منين
داكان ابنى وكان اكتر وكان عنتر
وعمره ف يوم ماكان اسود وكان اخضر
لكن خايف يكون السيف بقى جريدة
يكون العضم هزمه السوس
وتبقى النفس مكسورة
وواقفه خايفة ووحيدة
والاقى إيديا مش ويايا وبعيدة
واكون مقتول
بإيد القهر فى قصيدة
.............................
حمدي موسى