اللون الباقى جوه عنيا
عازم وياه ضلمة وعتمة تحوم حواليا
والدنيا رحاية تلف تدور تطحن فيا
لاتخلى فوقيا ولاتحتيا
................
ألوان الفرح مخصمانى .. معندانى
تيجى لحدى وتحود تانى
وتقولها صريحة متعشمش
ماتحلمش
لا زهور هتفتح
ولا قلب هيفرح
والورد يبطلع فى القصر
والشوك من حظ البستانى
...........................
ليه بس شقايا
بيلف ورايا
وأنا كًبّدى رحايا
بيأكد معنى القرآن
وأنا راضى بحالى
رزقى وعيالى
وصلاح أحوالى
نفحة من عند الرحمن
يا آله الكون
عبدك محزون
ده بكن فيكون
تزرع فرحة فى البستان
لو شفت الفرح أو عشت حزين
لو عشت فى حلم أيام وسنين
هاصبر عالدنيا وقساوتها
ماهو برصه الجنة للصابرين
يكفينى عز بإسلامى كرمنى المولى كإنسان
بس أنا تعبان
نفسى فى حضن الأم زمان
أرمى همومى أرجع طفل برئ فرحان
..............................................
أيامها كان الأبيض أبيض بيشع بنور
والأحمر زاهى من الفرحة واقف مغرور
والأخضر كان لون الخير فى الريف مبدور
راحت أيام .. وأهى جت أيام
والدنيا تلف تدور
............................................
أتغير حالى
أتغير شكلى
أتغير حتى قلبى الأخضر
لونه إصفّر إتملى بالمُر
لأ واللى أمر من كده والأخطر
شال أحقاد
ومسه سواد
وباسم عناد حكم وأتأمّر
.....................................................
ياه عالدنيا وبلاويها
أنا حاسس أنى غريب فيها
لا قمر هينور
ولا شمس هتشرق
وتموت عالفرحة .. والفرح غريب
لا بعيد هيقرب
وتعيش متغرب
وتحس الغربة
وفى حضن حبيب
حتى صوابعك بتخون الكف
والراحة لراسك وده فين الكتف
والقلب يبور ينشف ويجف
والنفس ماليها صراخ ونحيب
................................................
كل الألوان .. أحزان أحزان
لا الأبيض أبيض بينور أصبح بهتان
والأحمر كان لون الفرحة بقى لون للدم وللطغيان
والأخضر فى الريف
بقى شكله مُخيف
نازل تجريف
وأتحط مكانه طوب وحيطان
مش شايف خير
مش باقى غير
اللون الأسود اللون الباقى جوه عنيا
عازم وياه ضلم وعتمة تحوم حواليا
والدنيا رحاية تلف تدور تطحن فيا
لاتخلى فوقيا ولاتحتيا
..............................................
شعر / ماهر أبوالمعاطى