ِلحد امتى يابذرة الواد العفى
هاستنظرك على أرصفة حلمى
وانا ملتحف بالبرد
ولحد امتى ازحف على المجموع
ونتيجتى تطلع فرد
انا مهما اخربش فى كروت الاتصال
مش هاجمع الكلمة
ولا راح اطول مكسب
انا همى جوا البيت
بيغلب همى فى المكتب
ليه الدواير كل يوم هىّ اللى ترسمنى
وضهرى احاول كل يوم فرده
ألاقيه بيقسمنى
انا نفسى حد ف فرحه يعزمنى
منى عينى أتبين خيوط الفجر
مين اللى راح يكسب ثواب فيّا
مين اللى ليه الأجر
دوّامه كل الطرق
وحاراتى صبحت سّد
واللى يكون فى الجيب
أقرب لى لو فى اليد
خايف ان ماجبتش ولد
بعد الممات اتهد
أيوه ان ماجبتش ولد
بعد الممات
هاتهّد
لكن هاجيبه منين
وتنازلى بدأ العد .
.....................
علي جامع