غاية انسان **********بقلم الشاعر المبدع / علي جامع

باحلم بك ..
فى الليل النايم على جنبى
بتجرجرنى لعمق البحر
واحلم بى جبان
مع ان عناصر تكوينى
من نفس عناصر تكوينك
وبإنّى
زيك.. انسان .

باحلم بك
واصحى من الحلم عشان افلت
من أقوى حيتان
يقهرنى
صحو الحرمان
آسف على قولة انسان
آسف لو هاصرخ من قهرى
مانتاش انسان
البر طريقك ورفاقك فى البر غيلان
والبحر صديقك وصحابك فى البحر حيتان
والجو مسخر لرحيلك على أى مكان
تبقى انت الجان
تبقى انت الانسان الجان
مافاضلش غير ابحث عن نفسى
واطلع انسان .
.............
علي جامع