كلمينى
فهمينى
هى جاية القسوة منك
وللا دى قسوة سنينى
انتى بعدك بإختيارك
وللا مش حاسه بحنينى
لو غلطت كنتى عاتبى
مش تعاندى وتسيبينى
الغياب مش ليكى انتى
فى غيابك مش لاقينى
كل حاجة ماسخه باهته
بعدك انتى يا نور عيونى
كل ثانية تمر بايخه
لو ما جاش طيفك يزورنى
لو ماكانش ف يوم يجينى
انتى لازم تيجى فوراً
انتى لازم تلحقينى
الحقينى
لسه فاضل خطوة واحدة
بين فراقك بين جنونى
لسه حبك هو حبك
لسه قلبك هو قلبك
جاوبى قلبى وطمنينى
.....
أحمد حسن عمر