إعتـــــــــــــــراف . ************* بقلم الشاعر المتميز / علي جامع

امتحان
رهبته تهز المكان
وسؤالاته الاجباريه
ع الضحيه
كلها دم وديدان
فايحه من ريحة اللى ماتت جوا قلبى وجوا فكرى
من زمان
------------
ايه علاقتك بالأميره؟
كانلى دا أول سؤال
من زبانية السريره
بعد ماحرقت العهود
واسترحت من الشهود
واندفن جوايا همى وجرح عمرى
واستكان
-----------------------
ايه علاقتك؟
السؤال مطروح وملقى
والجواب
لسه متعلق بروحى
جوا حلقى
لو نبست بحرف منه
بعد منه
دوغرى هابقى خبر ل كان
----------------------
ايه علاقتك؟
قلت قولوا على اللى بعده
قالوا موصول باللى قبله
واللى قبله؟
قالوا تتعلق فى حبله
قلت يعنى الشنق لزما
قالوا حتما
قلت الغوا الامتحان .
...............
علي جامع