عربية السريحه شايله الناس جثث
..... عماله تتنفس ببطء غريب وتضحك للهوا
عربية السريحه بتدور بالدوا
زي اللي راكبين وشهم مليان حاجات
اسم اللي قاعد زي اسم اللي اندهس
شبه اللي ناوي يموت فمات
شبه اللي ساندين ع الرفارف
....... يخبطوا الريح بالهدوم الواسعه
ويسدوا الخروم الماليه أرواحهم بلقمة عيش
............. ويتهجوا البنات
شبه السكات عمال بيتسند كبيرهم ع الصغيّر
والضعيف ع الجوع
ومقطوع الدراع ع الخايف المضطر
والأعمى الكسيح على صاحب العاهه
ماشيه وحياة ناس ياما ماشيه وراها بتزمر
الورد قمّر ع الخدود م الحرّ
والريح موجه ناسه عكس البر
والناس كما الصرّ ف أيادي الناس
ماشيين بلا أنفاس مع الماشيين
بيبصوا من تحت الشيلان خايفين
ويناموا فوق أسفلتها جعانين
ويقوموا زي الميتين يستنوا خولي الوقت
عربية السريحه لو دقّقْت زي المحمل المكشوف
كل اللي راكب فيها عنده ظروف
باصص لفوق بعيون ماليها الشوف
بيبص للأطفال وكله كسوف
بيعامله خولي الليل كأنه خروف بيشحت فرحه م المذاليل
الضلمه جوه القلب خط طويل
والصمت نهر النيل إذا جفّ الكلام
ريحة الهدوم أحلام في دقيّة بصل بايت
راكبين وقطر المهزومين فايت على عيدان الشجر
قلب اللي بيحب المعاني الصلبه كان زي الحجر
عين الشيطان موشومه فوق دقن الغجر
عين الملاك إياه على الراكبين
خولي البيوت المفتوحين للطل شايل سيخ
كرباج جناب الباشا عامل شيخ
سمك البحيره ما كانش فيه بطاريخ
والصيادين سارحين بدون شماريخ
خولي العيون المقفولين بيعد أنفاره
وهبل في أرض قريش بيغسل وش كفاره
والمارد القاعد بيستنى العيار يفلت في قلب المتهم بالقول
الشاهد المسكين بيهرب م السؤال
الفرق بين النور وبين أم الخلول
لو كنت عارف (كنت أقول علطول)
صدقني مش عارف
عيل من الراكبين بيتبسم بشوق جارف
واحد على أرض الحنين بيعد ع السبحه اللي مش باينين
كان في الطريق للموت عيال صايمين
جامع ودين وعصابه غلاّبه
ودراع بيكسر زند دبابه
عربية السريحه ماشيه بتقطع الغابه
وبتدهس الراكبين
وتدوس بعنف غريب على الواقفين
وتوقع القاعدين على النايمين
هزوا النخيل ما طرحش في بلاد العدو غير جمر
هزوا القلوب المخلصه بالأمر في صدور العباد
أصنام بلاد الرمل ماشيين ع الطرق يا قوم عاد
بيشوفوا أعداد الجيوش
البنت بنت الإيه عليها جوزين رموش
واقفه الوشوش بتبص من خلف الوشوش
خولي الحروب ما هيرضهوش المدنه تسقط ع الهرم
ولا يرضهوش قلب العيال اللي اتخرم
ولا يرضهوش اللي اتحرم من روحه قدام النهار
عربية الأنفار بتجري بحملها
للي يراضيها بكلمه واللي يذلها
والدنيا بتميل ع الغلابه بضلّها المليان بارود
صمت الوجع في القلب دايس ع الحدود
فاسمعني يا صاحبي اللدود
لما العدو هز البلح ما طرحش غير حنضل ودود
قالوا زمان الجوده بالموجود لأصحاب الندا
للساده زوار الحسين والسيده
ولأي إنسان كان فدا
واقفه الرجال بالشوم لدبابة العدا
عدت فراخها مسعده وسندت دماغها بكفها
................. ونامت على جدارها الضعيف
عربية السريحه تشبه للشجر وقت الخريف
البنت من غير قصد داست ع الرغيف
ضغط العدو ع القنبله بعضمه العنيف
وقع الرطب والتمر مـ الراس الشريف
.............
سعيد_شحاتة