حسيت بالسن؟!
وان العمر يادوب
حبِّة مسافات؟!
بتمر ساعات
وان الفاضل من عمرك
حبِّة تفكير
مفاضلش كتير
كل الفاضل من عمرك
محتاج تدبير
محتاج تقدير
محتاج تديله
اللّي مخدتوش
وشوش × وشوش
عدِّت على عمرك
مااتعلّمت
بس اتألمت
بكيت وندمت
وتاني رجعت
وياريت حسيت
إن الدنيا هاتدور بينا
مهما عانينا
هتغير ياما كتير فينا
عمرها ماتغير اسامينا
هتجور على جسمك
وحلاوتة
هتغير طبعك
وشقاوته
لكن ماتغير يوم
قلبك
لو يوم حبيت
راح يفضل صاين
فيه حبك
لو قولت نسيت
حتى ملامحك
هاييجي اليوم
وهاتتبدِّل
لكن عمرها
ما ف يوم تِدبَل
كل اللي بيحصل
علامات العمر
عليه تنور
وتعيشك اكتر
عقلك يظهر
وساعتها تحس
إنك أكبر
من كل الدنيا
ومشاكلها
وتبطل تاني
تشاكلها
أو تشكيلها
هتشوف الدنيا
بعين تانية
انها فانية
وهاييجي اليوم
اللّي تفارق
خلِّيك فارق
جمّع احبابك
وراضيهم
دا مادايم فيها
الَّا الخالِق
....
أسماء كامل