عيل مأنجش الشقا
روحه تملى مصدقة
دوره بقى
ولازم يزاوله
مالُهش دعوة باللى حولُة
حتى اللى قرب واللى حاولوا
اصبحوا مجرد ديكور
يصرخ المخرج يقول
_الحياة مجرد قشور
والخلاصة ان دورك
رغم انك حد تافه لست مَعنِى
بس برضه اهم دور
كلمتين فى العمق يعنى
فلسفة تبرير لجوع
او معادلة للشبع
حكمة تنجح فى الجموع
او مقولة تتبع
خد نفس
راجع دفاترك
كل اللى حاصل ده
بخاطرك
ما الدنيا الا مسرحا
يعرض خواطرك
احسبها تانى
متعشمة بكبشة امانى
اختار تقوم بدور امير
او دور اساسى و محورى
والاختيار المفترى معووج عليك
الكدر زانق فوق بدايتك
شظيُه داخل غصب فيك
طب عيد من الاول حكايتك
بس سلط نور فوقيك
شوف بروحك مش عينيك
شاور المخرج عليك
يلا دورك
وضح بقى لحظة حضورك
خُش روح شخصيتك
لازم تكمل قصتك
قول جملتك
واختفى
وسيب دراما النص
تولع
ثم تخبو و تنطفى
بعدها
ضلام مخيف
اخلع فى جلدك
قبل ماتريح بساعة
ونام نضيف
حظك سخيف
فضرورى انك تختفى
خليك وفى
وسيب دراما النص تاخدك من ايديك
تسحبك فرحانة بيك
وانت بتصارع حبال الخوف
فى هيئة الوحش الخرافى
تنزلوا قاع المحيط
بعدها ..تطلع لوحدك
فوق السطح طافى
واللى يغرق
المزيف
لسة مستنى الاضافى
لسة بتقوم مالسرير
مخنوق مقريف
ضل عاكس برضة ضل
تلبس هدومك
قصدى جلدك
قصدى
دورك اليومى الممل
يشاور المخرج عليك
يلا دورك
اقرى عالواقف سطورك
بعدها
ادخل ومثل
طلع الأحساس بغل
جُملتك تشرخ فى زورك
الحكاية مش ظهورك
للأسف يا حلو دورك
كل يوم عن يوم يقل
الامل داخل يحل
بس خبطه القطر فجأة
الحياه طلعت مفاجأه
لقمة حادقة
وغصب عنك تزدردها
بعدها يا حلو قوم
واجه الخوف والهموم
البيبان بارد حديدها
جملتك لازم تعيدها
كل يوم
هوه هوه الكاست برضه
والاماكن هيه هيه
الديكور مازال فى ارضه
وابتدى يقدم شوية
حتى تفاصيل الشوارع والوشوش
الجديد ماشفتهوش
ظبط المكياج وزود فى الرتوش
النهاردة دور خطير
من زمان ما عشتهوش
.......
جاسر جمال الدين