لو قولت نسيت
للدنيا حيطان حَ تفكرني
على نقش جدارها
خطوط من عُمر اللّي سكنّي
ايام وسنين فاتت قلبك منِّي سرَقني
طب اشيلها ازاي..
اشيل ازاي ذكرى كلامك من بين طرقي
وازاي انسى لمسة ايدك ف اوقات قلقي
طب مين هيضم عيون دَمعي ساعِة غرقي
وازاي انسى..
ازاي انسى فرحة عينك لمّا تشوفني
نسياهم اه !!
يوم ما اتعلم قلبك يقسى ويخوفني
أصل الحنية ازاي تتحول نار بيها تحرقني
معقول...
معقول القلب الطيب يتبدِّل ويكون جبروت
والعين اللي بتنطق حب ح تكره للموت
والحضن!!!!
الحضن اللي براحه حدودي، ما بقاله حدود!!
عادي!!!
عادي بقيت عايش مرتاح كدة من غيري!
عادي اللي ادتهوني قادر تديه حتّى لغيري!
كان كل كلامك لأصحابك هيّ مصيري!!!
طب فيييين!!!!
فين لما بقول ياحبيبي، ترد بقلب حبيبك
واما ازعل وابعد، وتقول والله ما ح سيبك
وتزعق وبعلو الصوت
ياحبيبتي انا قدرك ونصيبك
ح نساك
ح نساك وانسى معاك الحنية وطيبة قلبي
انا عارفة الوجع اللي انا شوفته كله بسببي
وانا راضية..
راضية ومش طالبة غير عوضك بس ياربي
انا راضية ومش طالبة غير عوضك بس ياربي
....
أسماء كامل