الشارع هُس
والخوف بيبص على الوحده
عواميد النور مش ف الموضوع
النور مقطوع
والعين تخدعها ساعات أشباح
وساعات بيبان الشارع سد
وساعات تردد أنفاسك
من إحساسك
مش من صدرك
وتخاف تتردد
أو ترتدّ
أو تسمع حد ينادي عليك
: تشتدّ عليك الريح وطي
طب نعمل إيه
لو فضلت كده على طول تشتدّ ؟
هتفَضّل تدي الريح وشك
وتغش عنيك
هتحايل نفسك
أو نفسك هتحايل فيك
هتعيش بتقسّم قرابينك
بينها وبينك
تفتح شبابيكك بيمينك
والريح بتسد
طب تعمل إيه لو حلفولك
واتحالفوا عليك
واختلفوا يدوبك ف التوقيت
لو طردوا حكايتك م الحواديت
أو سرقوا عنيك
لو خطفوا أميرتك من سرّك
أو فضوا قصايدك من صوتك
أعلنوا موتك
أعلنوا انك كنت القربان
دلوقت يجوزلك تتنهد
دلوقت يجوز تحزن بأمان
تحزنها بجد
..........
مصطفى مقلد