أنا الملبوس
بجن الشعر ومخاوي
بشف قصيدتي من روحي
أنا الحاوي
ماتعربونيش فبيت نحوي
انا معجم
بترضع منه قواميسكم
قواعد صرف
فغضوا الطرف
عن فكرة تلاقولي
قانون ثابت
انا تعبان
بشق الشق وادّاري
يسبح برق
يتمطر عبير سمي
علي الصوره
وعندي جهاز
مابين قلبي وبين مخي
بيفرز كل تفعيلة
محال تلاقيها مكسورة
لسابع أرض انا ببعت
خفافيش القبور تكشف
حكاوي العضم لترابه
انا توجت بالسلطان
بنيت عالم من الأمجاد
انا حيطانه وابوابه
انا وشعري
صنعنا الحس والفكرة
ومن رحم اللي فات كله
عرفنا نجيب جنين بكره
وبنشبّه علي روحنا
فحياة برزخ
وعضم التربه متسول
لدعوة ابن من صلبه
ولسه ماجاش علي الدنيا
وجيفه قافيه مالحاكمين
وصبرها اللي باع الطين
ودمع بتنزفه الأبيات
قصيدتي بطلق مضروبه
وهي بتدّعي في الصلوات
ومن نور الكلام والوحي انا اتوضيت
انا سكِّنت كل الناس
ف شطره بيت
وشطره التاني
لطموحي
وعزة كلمتي الباقية
يموت شعري وانا عايش
يعيش شعري وانا ميت
ولو مأقدرش
اجيب الصوره مالواقع
ولو مأقدرش
اكون قاضي
واكون مسؤل عن الكلمة
يكون احسن
اموت قبل اما ابطل شعر
.............
كريم إبراهيم عيسى شرف