انا مش يوكابد عشان ارمى
خيطان حلمي في يم الصبر
و لا ارتل ترانيمي
و لا رافعه أيادي القهر
و لا بدلت ف المله
و لا اتمنيت يجيني اليوم و تتبدل اناشيدي
و يسبح ف الهوى نفسي
فتتنفس هوى سيدي
و امد الآااااه فتوصل لك مع ايدي
و مش رحيل
و مش رحيل عشان اصبر على العله
و لا حطمت انا بحلمي قساوة القلب يوم عيدي
و لا كان لي يوم انا بنيامين
و لا جيبت سيرة الأولين
انا مش شهيدة كربلاء
و لا بدي درس عن الوفاء
و مش آسيا
و لا قاسيه
و لا عندي كمان فرعون ملك امري
فتتآمر على عمري
سحالي القصر من طيبتي
فتعجني و تأمرني
اسدد كل مديوني من العفه
و تتعفف جواري هامان
و تتأفف من العطر اللى فاحت ريحته من شعري
و انا شعري بيوصفني فيعرفني
و لمابفكره بإسمي يقول حافظه
انا العدرا
و مش مريم
و كنت بتول و ليا م الولد خمسه
مفيش منهم يسوع واحد
و كنت بهز ف النخله.
فينزل لي رطب فاسد
و لا زليخه
و لآ زليخه و حب العمر يا يوسف
و لآ خطيت على جبيني خطاوي الهيت
انا بدمعي شفيت و رويت
و ضاع مني ضيا عيني
لكني بالإيمان أبصرت
و لا يمكن أكون أمنه فشيل النور على قلبي
و اغسل بالتقى ذنبي
و اجيب للدنيا سيدنا
يبدل ذلنا بعيدنا
و لا حتى حليمه أكون
و كان نفسي
يسموني على سميه
فاشد دراعتي ع الآاااخر
و امزع كل اوصالي
و اتمسك
فاتتمسك شراييني بهو الله
لكن سموني ع العزة
و قالوا اسمها عزة
و لف الإسم بيا بلااد
و كان الوصف ليا جهاد
لا انسيه و لا ف الشرح جنيه
و قالوا عني دي حوريه
لكني أكيييد
بخاف جدا على ديني
و ترويني و لو آيه فاتحييني
و اردد بيها احاديثي
انا المحميه بالقرآن
و ذكر الله مكفيني
و قالوا عني عناديه
لكن عندك يموت الكبر ما يعاند
و تتحول عصا موسى
تشق النخل ف الميه
و تتكون سفينة نوح
فيها الاختين بيترجوا
امانه يا ابونا جوزنا لشاب تقي
يفج النور على ضيه
فايطلع منها كل نبي
ياريت يا خديجه تحكي لي
عن الضمه ال كانت ف الدنى أولى
و ليه قالوا بإني آمه
و انا الأمه اللى من أولى
و منقوله من الجنه على الأرضين
عشان بالصبر ده أجاهد
انا مش يوكابد
............
جهاد زيادة