لو كنت باحبك كنت اجرى
واقول لك وش
طول عمرى مابعرفش اخبّى
ولا باعرف أغش
احساسك خاب المرّة دى
وطلع كدّاب
شيلى الموضوع من تفكيرك
وخدى لك دُش
........
انا عمرى ما حبيت غير واحدة
بكل الأحباب
دخلت على قلبى لوحديها
قفلت لى الباب
حلفت ما حتخرج من قلبى
ولا حد يُخش
........
ماسابتش ف قلبى اتنين سنتى
قاعدين فاضيين
غطت بجمالها ورقتها
قلبى المسكين
محتاجة بدل قلبى تغطّى
قلبين تانيين
مش ح اكتب ف جمالها بحاله
دا كفاية الرمش
........
كتبت على قلبى بنظرتها
مغلق مشغول
كل اللى يهوّب ناحيتها
بتثور على طول
ماهو مش معقول حد يفكر
ماهو مش معقول
بقى كل اللى يشوف ثورتها
بيخاف ويكش
............
كان نفسى اقول اسم حبيبتى
وتصبحوا شاهدين
واقول دى حبيبتى ونور عينى
واحلف لى يمين
لكن الموضوع سر ما بينا
وكدا متفقين
لو حد سألنا ف يوم نسكت
ومانتكلمش !!
..........
أحمد حسن عمر