ايوه تحيا
رغم بطش الظلم تحيا
رغم كُتر الجهل تحيا
يخنقوا صوتها ف يناير
يعدموا النبض اللى ثاير
برضوا عايشه ولسه صاحيه
مصر تحيا ايوه تحيا
يقتلوها فى الدويقه
او عيالها تموت غريقه
او يموت مدهوس امالها
فوق شريط قطر الصعيد
مصر واقفه وصالبه طولها
مصر قادرة تشب طولها
بلدى جايه من بعيد
ايوه جايه من بعيد
من بصيص النور شايفها
فوق خدودها كتير عجافها
والسنين رغم اختلافها
ورغم تسييس العبيد
مصر جايه بتوب جديد
مصر راجعه ايوه راجعه
مهما كان فى عيونها فاجعه
ع اللى ماتوا وع اللى راحوا
وع اللى لساهم بعيد
ايوه جاى من بعيد
رغم موت الكل صاحيه
يمنعوها تقول ولادى
يمنعونا نقول بلادى
يمنعونا نثور فنلقى
مصر جايه ف كل ناحيه
بتنادينا بعلو صوتها
دمنا ترياق لموتها
عشقنا سراديب حياتها
واحنا اجمل ماف صفاتها
لما غيرنا بيوصفوها
مصر راجعه يا خلق راجعه
مهما حتى يكتفوها
مهما يسعوا ويخطفوها
من ايدين الثورجيه
مصر بعد الغيبه جايه
مصر بعد الغيبه جايه
مصر رغم البطش عايشه
صالبه طولها
ولسه صاحيه
مصر جايه ف كل ناحيه
ـــــــــــــــــــــــــــــــــــــــــــــــــــــــــــــــــــــــــــــــــــــــ
وائل عبدالله