دحرجت عينى ف اللى فات
تمتمت تعويذة حنين
حضَّرت جنِّى الذكريات
صرخ الجماد من حضرة الأرواح وناح
زهزه لى بكره بالامل
يومى اختشى
وسدل رموشه عالقدر
وربط عيونى واتنسج
على قلبى عش العنكبوت
نسخت شباك العين سند
استقبل المخ الملف
اتحملت كل الصور
بهتانه شوق
وقمر صناعى الحس
بيبث الوداع
فتش جيوب الذكريات
اتشملل الإرسال وذاع
مأذون فتح دفتر رصاصه
اغتال طفولتى
اتنين شهود
ملكين عذاب
استعجلوا وقت الحساب
ورقه فراق أمى وأبويا
كانت شهادتى للوفاه
مقتول بنصل الاختلاف
وترفطوا عين
قلبى اللى عمره فيوم ماخاف
ف ازاى هاتقدر ضحكتى
تطرح وانا مبدور ألم؟
وازاى هاواصل سكتى
وانا أعمى عكازى اتعدم؟
كانت حضانتى موكله
للأب وبأمر القانون
سافرت يا امى فمركبك
ريحة الحاجات الطيبة
الدعوة والخوف والسهر
حنية فى الأربع فصول
زى المطر
بستوحى صورتك
نقش على كل الحيطان
بالمح عنيكى
ف لوحه مسنودة
على خصر الشجر
بالقى شفايفك فى الحرم
حاضنة المقام
وجبين مسطَّر حبر سرى
باللى هاتشوفه العيون
يستنسخون
اشباه ملامحك جوا منى وللأسف
اتعودا مايفرقوش
مابين مﻻمحك
نايمه على حضن التحف
ومابين تمن
لحظه باعيشها فحضن امى
ماتعلموش ان الوجع
بيزور ف اركان الجسد
وبيستقر ف قلبى انا
قلبى قبور
مهجوره مسكونه بعنيكى النعسانين
تحت السواقى الغرقانين
من موج شعورك ع الغيطان
وعيدان مﻻمحى اتيبست
من يوم ماودعتى الغيطان
واقف كأنى عود مآته
باحرس الطين اللى كان من طلتك
ينضح خضار
واخدت بنسه شعر ليكى
بحطها ف الكوبس واتكهرب
وجسمى يتنفض
فيمر كل شريط حياتى
قصاد عنيا ويتعرض
بيتنا الجميل
لحظة شروق الشمس
من خرم الستار
بتوضى عينى بالدفا
وقت الغروب
سرسوب بيتسحب على استحياء
يخدر فركى من تعب النهار
المدرسه
طول انتظارى لحصة الالعاب
وكيفى البحلقه ف نسر العلم
واسأل ف نفسى
بجد نسر وﻻ راسمه ع القماش؟
رنه إيقاع خطوه ابويا ع السﻻلم
سيمفونيه اتوزعت
نوته حواسى الخمسه صلت ركعتين
وقميصه منقوع ف الشقى
وشق الإيدين
بوسه ف جبينى
وحضن اوسع مالمحيط
حنيتك
لما بتدينى جناح الفرخه
قبل ماتستوى
او شدة الألم اللى ع الكتف الشمال
من قارصتك
علشان ماكلتش باليمين وقت العشى
او علقه سخنه كلتها
علشان نسيت الجمعه
اقرا الكهف سهو
كل الحاجات الحلوه دى
مالحقتش اشبع منها
بيتنا الجميل مابقاش جميل
الصبر عشش فوق بيبان
قلبى الجريح
وشراعى موجته بتدعكه
وغزلت من اشﻻءه فوق شط السنين
اكبر ضريح
وبقالى مولد والعيال
تيجى تزورنى بالشموع
والجرح ليه؟
كل اما يلمحنى يجوع
يبدء وينهش سترتى
ويعرى إحساسى البرئ
وبينتهك حرمة مشاعرى بشكل سادى
وصالبنى فوق ضهر الفروع
وحكانى غنوه للعيال
لخلخنى من فم الزمان
وسرح بسوسه ف جتتى
وسجد لشيطان الدموع
عندى عاهات
نبتت واصبح ليها جدر
اتشوهت الأورده
والدم مسكون بالوهن
شريان برائتى
شد عوده واتفطم
على يتم هلّ فغير ميعاده
وخدنى ملك
مشوني جبرا ع الحبال
بالياتشو راسم ضحكته
بريشه دموع
قسمونى شرك
حاول ابويا بكل انواع الدلع
إنه ينسينى الوجع
كان ممكن انسى لو الجمل
بيعدى من (سم الخياط)
كان ارتباطى بحضن أمى
امر محسوم باليقين
حضن الحنان
اللى عشان قلبى اتخلق
ضِل الامان
اللى حاضنى رقانى وقرالى الفلق
لون الحياة باهت يا امى
والثوانى اتلملمت
على شط بحر من الدقايق
وسط دوامة ساعات
بتدوّخ الأيام
وتقتل فى الشهور
وانا برضوا لسه ف احتياج
انى انسلخ
من عقدة انى فوسطكم
حاصل وعامل مشترك
او حاله خاصه على الملأ
انا ابنكم
انا بشحت الحنية من كل البشر
وبسد جوع قلبى اليتيم
اللى على جمرة فراقكم مستوى
نسر العلم
يقلب نعامه
يدس راسه فى القماش وبيتبرى
وكفر بأنى
احتجت حضن امى وابويا
عشان اكون انسان سوى
.......
كريم إبراهيم عيسى شرف