وأخيرا قالتلى بحبك
وبرغم إن أنا طبعا عارف
إحساس الفرحة اللى ف قلبى
وكأنه طوفان
إحساس جااااااااارف
مع إنى ب ألمس نبضاتها
وقت أما الإيد
ترتاح فى الإيد
وألاحظ لهفة نظراتها
ونفسها المليان بالتنهيد
ولأنى عنيد
ولأنى خجول
ولأنى بخاف إنى أبقى وحيد
مارضيتش أقول
لا تقول إن أنا فى الهوى مقتول
سبتها تنطقها لوحديها
من غير مالسانى يطلبها
مع إنى باسافر ف عنيها
واحلف جواها اني حبيبها
فاسمع قلبها يترجانى
وبيتمنانى أبقى نصيبها
طب هو أنا أطول
والنبي لو قالت
والمصحف
ل ح أقول على طول
دانا دايب دوب
وانا ياما رسمت ف كراريسى
كيوبيد وقلوب
ومليتها قصايد توصفلها عشقى وحبى
وانا عارف إن أنا مش عارف عنها أخبى
فانا فاهم باعمل مش فاهم
من خوفى لا اكون فى الهوى واهم
ويكون قلبها مش ميال لى
لكنه أخيرا من لحظة
صرحلى بإحساسه وقالى
قالى إتطمن حافضل جنبك
معناها إنه قالتلى بحبك
بس أنا خايف
لو أكون مش صاحى
وأكون باحلم
إزاى أتأكد مش عارف
ودا معناه إيه
الله أعلم
الحيرة إتقلبت جوايا
وبقت حيرتين
إذا كانت فعلا قالتلى
وإذا كنت أساسا أنا صاحى
طب هو أنا مين ؟
يعنى أنا هو أنا ؟
ولا أنا إزاى ؟ولا أنا إمتى ؟
الله ؟؟؟
ماتبطل يابنى ماهيش طالبة شغل أونطة
إركز لاتحس إنك واقع
فتكش قوام أو تتراجع
وحذارى كمان إنها تاخد
عنك فكرة.. إنك ساقع
عيشها ف جو رومانتيكى
واديها شعور دافى ورائع
واهى قدامك
إيدها ف إيدك
بتقولك غاوياك و بريدك
سكنها ف قلبك خبيها
خليها ف دمك و وريدك
لو فاكر إنك مش صاحى
إوعاك تقلق إياك تصحى
الحلم جميل ،الحلم بريئ
مليان بالحب وبالفرحة
طب ليه خايف ؟
والله ماعارف
إحساس الخوف اللى ف حلمى
وكأنه طوفان
إحساس جااااااااااارف
..............
هشام الدشناوى