مطر و غيوم
و ليل مهموم
و ناس بتقوم تقع تانى
قلوب تايهين
دموع ف العين
و روح مخنوقة بتعانى
و لو تسأل ما تلقى جواب
يريح نفسك الخايفة
فترجع تنتبه انك
عنيك م التوهة مش شايفة
و لو شافت ما تحلمش
يكون بكره اللى جاى اجمل
عشان لون الحياة بهتان
مفيش الوان عشان يكمل
و لو احاسيسك اتهزت
و قلت النور ف يوم هيبان
و قلت ان اللى جاى ممكن
يجيب لى امارة او برهان
تلاقى الجى بيمسخ
بيرمى هموم و يطرح خوف
لانه خلاص ماهوش قادر
يسير ف طريق ماهوش مألوف
يا ارض براح و محبوسة
و فيكى الورد طارح شوك
و خانقة الضحكة جوانا
و عايمة ف دم بات مسفوك
كفاياكى وجع فينا
سيبيلنا حتة بالالوان
يجوز بالصدفة نقابلها
دا انا نفسى اعيش انسان
............
فهمي علي نصر