باشوف روحك انا بروحى
و ادوس حبة على جروحى
عشان لحظة ما بتبوحى
جراحى كلها بتزيد
اغنيلك ... تبكينى
يسيل الدمع من عينى
و ياما كتير خاصمتينى
و نار تانى كتير بتقيد
بترمى شوك على السكة
و دايما تخنقى الضحكة
و رابطة الدنيا .. مش فكة
و حبك من بعيد لبعيد
بتشكيلى كتير منى
و ناس ف هواكى تهمنى
و انا اللى رضاكى تاه منى
و دايما يخلف المواعيد
كفاية ... و ربنا دا كتير
اعيش محبوس تملى ف بير
بجد تعبت م التفكير
و م الاول تعالى نعيد
ما ياما حلفتلك انى
غريق العشق و كأنى
جعلتك عينى و الننى
و لو شوفتك باحس بعيد
كفاية بجد مش قادر
بقيت ناسى و مش فاكر
كرهت القفش ع الاخر
كرهت خصامناةبالتحديد
بدمعى تملى باتوضى
و ليل الحزن ما قضى
ف مين عبا و مين فضا
و مين ناقص و مين بيزيد
عشان خاطر حاجات بينا
و احلام لسه فاكرينا
بلاش العند يحرمنا
بلاش يا حبيبى تبقى عنيد
................
فهمي علي نصر