اياك تخاف من صدّها
خليك جريء ...
اطلب رقمها وقول لها
إنك بريء ...
وانك بَقيت على عهدها
وانك وفيت طول الطريق
وانك اكيد مَبعتهاش
وانك امين على حُبها ومَخُنتهاش
ولحد اخر عمرها
فاكر لها ..
كل الوعود
وان الحياة في بُعدها أسوأ حياة
وان الألم مـ بَعدها
واصل لأخرُه ومنتهاه
وان الأمل مالهوش وجود
حتى الفرح بيبات حزين
سافر بعيد رافض يعود
احلف لها ...
انك لها ...
مخلص قووي ..
مش حد مليان بالجحود
اشرح لها ..
ان الفراق بينكم محال أمر اتحسم
فكّرها حتى بكوز درة
ليلة شتا بينكوا اتقسم
فكّرها حلم اتمنتوه كان اترسم
فكّرها لمّا اتكعبلت سَندت عليك
فكّرها ياما اتشبّكت ايدها فـ إيديك
ولمّا كانت تعترف ..
ان الأمان كله فـ عينيك
ومهما هَيكون ردها ..
اسمع لها ..
اسمح لها .. بالفضفضة وخليك صبور
اوعاك تِطاوع عِندها وحاسب تثور
عبّر لها ..
انك صحيح بتحبها
وانك غيور ..
وانت الوحيد بتحسها .
وان عيطت ...
ارحم دموعها وضعفها
خليك قـَريب من قلبها
اثبت لها ..
انك صحيح عاشق بجد
وانك في دُنيا العاشقين غير اي حد
بس انت حاول تتصل مَتخفش صد
من قلبك ادعي انّها .. عليك ترُد .
______________
محمود السيد