أنا المصري
لا انا هندي ولا شامي
فإ سمع مني يازلمه
لا انا حرمه ولا سيامي
انا البارد وانا الحامي
انا اللي الشمس محروقه
وانا القرص اللي مش دامي
انا الميت ... انا الجيفه
انا الشوك اللي في الليفه
وانا الديب اللي في جحورها
وانا اللي عشقت طرطورها
ولو كرهي يذيد حبه
انا مسافر ببسبورها
في عز الكفر بالمعني
انا أعلنت إسلامي
في عز الكفر بالمغني
انا سومه وانا رامي
في عز الحرب والعاركه
انا النبله وانا الرامي
في عز الجهل في العالم
انا ف سته إلزامي
في عز الهاريه والناكته
انا اللي باني أهرامي
وانا في الشعر لهلوبه
بحور الشعر خدامي
انا ببني بكام طوبه
انا الفصحي وانا العامي
بدأت الحرف من عندي
فخدها العبري والسامي
انا أحمس ... انا حابي
انا ناصر ... انا عرابي
انا قاسم امين لما
يعلم قاسم الشابي
انا الزير اللي فوقه الكوز
انا الميه اللي في البزبوز
انا زويل اللي ادهشكم
انا نوبل نجيب محفوظ
انا موسي انا الفرعون
وانا القمح اللي بات مطحون
انا العاقل وانا المجنون
ولو خربشت في صباعي
أبوظ لك في ست عيون
انا القلب الل في الساحه
رسم ع اليد تفاحه
انا العيل ابو رصاصه
أخدها بنفس مرتاحه
انا الشاهد وانا التربه
وانا الملح اللي في الشوربه
وانا الضرفه اللي متواربه
فقل لي تبقي مين انت ؟؟
انا الأول وانا التاني
وانا اللي النهر رباني
انا مصر اللي في القرأن
جميله صنع رباني
انا الشاكر بحمد الله
بياخد ولا إداني
انا القاصي وانا الداني
وانا اللي القطر عداني
وانا السكر
في بسبوسة حلا واني
انا الرايه وانا الدايه
وانا الطلق اللي في الوالده
وانا اللفه
وانا الفارس وانا الزفه
وانا ميزان العداله الله
وانا الكفه
وانا الصاري
وانا الدفه
وانا الحرف اللي في الكلمه
انا الشفه
وانا اللحمه اللي في الخلطه
وانا السن اللي في البلطه
فقل ل تبقي مين انت .....
انا اقول لك ......
مزاجك مش في حتتنا
ولا خيطك شبه خيطنا
ولا الطوبه اللي في الحيطه
ولا المونه
ولا القمح اللي في الشونه
ولا الميه اللي في القله
ولا العيش اللي في الحله
وتتمني لي في الكافيه
وماتت عينك الصافيه
وليه الكره دا كله ؟؟
ومات لك ناس ؟
منا مات لي
ولو ع الظلم طب هات لي
ميزان حساس
يفرق بين راسين أو راس
وإحنا اللي دهبنا تراب
وإنتوا اللي ترابكم ماس ؟
وإحنا اللي قططنا فيران
وانتوا اللي فيرانكوا فراس ؟
وانتوا السبحه والإيمان
وإحنا بنعبد الأوثان؟
وانتوا اللي مشاله سجود
واحنا بنعشق النسوان ؟
وانتوا اللي معاكوا فلوس
وإحنا بنشهر الإفلاس ؟
وانتوا اللي زمانكم جي
وإحنا اللي زمانا خلاص ؟
وميتكوا الشهيد الحي
وميتنا العجين الني ؟
واحنا الأرض نشفانه
وانتوا الري؟
فا وحياة المسيح الحي
ياتبقوا معانا ع الدكه
يا نتقابل في مصر الجي
يطول عمرك يامولانا
بإذن الله حتلقانا
في قلب الارض دي بالذات
وبنضفها بالمحرات
وبنسويها بإدينا
ونرمي البذره في الطينه
ونستني فرج ربك
تلاقي البذر مش حبك
فيطلع زرعنا نادي
تقرب له ماهوش راضي
لإن الكره مش عادي
عشان الكره من خالتك
ومن دادي
فصلي الفجر في مكه
وصلي الصبح في عكا
وخللي الخلفه ف سبعه
وصلي العصر في رابعه
انا مش تابع التابعه
انااااااااااااا مصري
فقل لي تبقي مين إتـــــــــــا ؟
يا إما تاكلك العته
..............
م. عطية شواش