نورتنى
قلبى كان واقف معاها
قال لى غيتنى
بعدها قامت لاغتنى
رحت فيها
انما لما كلمتنى عن ماضيها
رحت فايق
الساعات من بعدها
فى اللقا صبحت دقايق
وابتدى الشك يساورنى
ليه حبيبتى ف كل حاجه
بتحاورنى
هيّا مين
تكونش واحده من اللى بيقولوا عليهم
مخبرين
قلت تطلع من نافوخى
راح نافوخى بدالها طالع
قال لقلبى ازاى تفرّط
بالسهوله ف حب والع
بس فالح فى الشياكه وفى الوجاهه
أمّا هىّ الله معاها
موقفى منها صدمها
خلّى راسها بدل قدمها
وابتدت تواشيح عتاب
أخجلتنى
الدموع اللى ف عنيها
غرّقتنى
ابتديت اشعر بيأسى
لمّا للمولى شكتنى
وابتديت ابكى لبكاها
الدموع صعبت عليها
صفحه بيضا كات فى ايديها
سطّرتها
قالت اكتب من جديد
قمت شارى لقلبى قلب يشد أزره
من حديد
لجل يتحاور معاها
الحكايه منتهاها
الغرام بطيخه ( قرعه)
واللى جوّاها أكيد
راح يشيلك فوق جناحه
أو يخليك م العبيد
أو يحطك تحت عجلة
قطر ع السكه الحديد
للغرام فرعين ياصاحبى
وانت حّر تودى فيزتك
فرع دمياط أو رشيد
........
علي جامع