لو كنتى واحده حركه
زوجك رح تكسبيه
العيشه دى مشاركه
تحلا بيكى وبيه
لو هو حتى هايف
من كل الدنيا خايف
ببوسه م الشفايف
لو شاطره تشجعيه
هيحس له بقيمه
وينسى طباع قديمه
وم الفطره السليمه
بلاش لحظه تلوميه
ولو كانت طباعه
فارد ع الناس دراعه
كونى الدفه لشراعه
بالذوق برضه انصحيه
فيه بينكو ضرورى ساعه
يقبل فيها الشفاعه
وفيها منه طاعه
ساعتها توجهيه
لو ليكى عنده حاجه
قدمى له ديباجه
طلبك وبدون سماجه
فى رواقه اطلبيه
العيشه مسئوليه
عليكى او علي
وعيالنا دول هديه
بيتنا نحافظ عليه
لو بص يوم لغيرك
غيرى خط سيرك
وشوفى ايه يضيرك
وبنفسك صلحيه
ما فيشى حد كامل
العيب للكل شامل
واللى ماهوشى خامل
يشوفه ويداويه
ولو مره اختلفنا
نشوف اسباب خلافنا
نتعلم من خلافنا
ونشوفهم عملوا ايه
اصل الحياه تجارب
ماحناش جايين نحارب
والدنيا زى قارب
يغرق لو شرخ فيه
.............
احمد عبد الوهاب
ابن بيرم