كل واحد من أصحابنا عليه دور يعزم المجموعة .. مجموعتنا خمسة أنفار.
الدور النهارده على (...) كل ما نختار لها مطعم تشوح لنا بإيدها و تهز راسها و تقول..لاااااا... مش نظيف..مش راقي .. زحمة... ريحته مش حلوة....إلخ.
قلت :
_خلاص يا جماعة ندخل محل (...) من أغلى المطاعم عندنا.. و أكيد نظيف و كله تمااااام.
سكتت صاحبتنا و إحنا فاكرين أنها رضيت .
طلبنا اللي عاوزينه.. هي قالت:
هطلب بعدين بطني مزحومة.
قلنا لها:
_ احنا كمان هنستنى لما تجوعي .. دي حلاوة الأكلة في اللمة
بس هي مصرة .. و كانت طلباتنا محدودة كالعادة في دورها .. الوحيدة في الشلة إللي مش بنحب نكلفها.. أكيد أنتم عرفتم السبب.
جعنا ع الأخر .. طلبنا الأكل .. و هي اختفت من على الطرابيزة.. و غابت شوية و جات قعدت معانا.
قام السفرجي بيلم البواقي و الفوارغ.. و شفناه و سمعناه بيقول لصاحبتنا :
_ صحباتك كلهم نضاف و زي الفل أهو ..حضرتك كنتي بتأكلي عند المغسلة بعيد عنهم ليه؟!
شهقنا و كحينا و السفرجي احتار يشرب من فينا مية .. قمت سألته :
_ هي كانت على طرابيزة تانية؟
_ لا.. واقفة بتاكل ساندوتش جبنة.. مش من المحل.. و الكيس بتاعه ف شنطتها.
الكل ضحك و سبناها تحاسب على الطلبات.. و طول اليوم و في كل مشوار نسألها:
_ جايبة الساندوتش معاكي ولا...؟!
فيه حد بجيب معاه ساندوتش في المطعم ياااا فاااالحة!
***
(سالمة المغربي)