الألم يسكت شويه
أفتكر ندهك عليا
وانتي بتقولي .. حبيبي
مد إيدك خد إيديا
بس انا غرقان لشوشتي
وانتي سابق جيتي حوشتي
حزن واحد .. صبحوا ميه
قلت أبعد يا زماني
الساعات جريت ثواني
حتي في الأحلام بعاني
والوجع غرق عنيا
هي ليه الدنيا ديه؟
جايه عز النقاريه
تمسك السيخ اللي حامي
تغرزه ف أول كمامي
ترشقه ف أخر قلوعي
لما اصرخ أأأأأأأأه ضلوعي
كانت التانيه بحراره
مزعت نص المراره
كنت بشرب 100 سيجاره
ااااااااه بحبك بالأماره
كنتي نصي ... لأ بصي
كنتي كلي
كنتي بالأمر المباشر
كنتي ضلي
كنت بعرف بيكي ربي
لما اصلي
كنتي في القبله قصادي
لأ جنبي ... لأ ورايا
كنتي حتة بومبانيه
كنتي أخر ضحكه في
أخر روايه
كنتي أمي .. لأ ضنايا
بس عايزك تفهميني
انتي قلبي
أصل قلبي نص ديني
كل سكته من سكاتك
توجعيني
أي كلمه نص كلمه
ربع كلمه
تقتليني
اقتلي جبني وسكوتي
موتيني ... مش تموتي
إعلني فيا الهزيمه
عودنا للحاله القديمه
زي ريما
لما باعت قلبها ... نفس الجريمه
لما مشكاح المرابي
خان عرابي
لما قال له ... جت سليمه
شوف حياتك
بيع حياتك
ذكرياتك
كل حاجاتك عقيمه
واشتري لعبه بلاستيك
فيها استك
كلمه يمكن يغني
كلمه عنك وعني
عن خيانتي للأغاني
عن لساني
لما كان بيقول بحبك
وانتي بردو مصدقاني
عن حناني
وانتي بردو مصدقاني
عن جناني
وانتي بردو مصدقاني
بس مالحقتش اقول لك
عن حياتي
وان اننا عايش وفاتي
واللي بتقول لك بحبك
دي رفاتي
وان اننا ماشي ف جنازتي
كل مادا
أصحي مش بلقاكي جنبي
يبتدي عام الرماده
كل مادا
كل مايخلص إعاده
كل مايخلص اعاده
كل ما يـــــــ .........
.......
عطية شواش