يكفيكو شر الانكسار
و الضلمة لو تسرق نهار
و الدمع يجرى ع الخدود
و الفرحة لما تتقلب فتكون دمار
يكفيكو شر الانحسار
و انك تشوف وجع البشر
راسم مسار
و الخطوة م الخوف تنعكس
علشان تكون حيرة و مرار
لما الديار
تلبس سواد الحزن و تخاف تبتسم
لما البكا ف عيون وطن
يحلف للازم يترسم
اشلاء جثث تملا المكان
عيل صغير يتقسم
و يلملموه بالاختيار
الايد دى ايده .. فلمها
من بين ايدين متبعترين
و الرجل دى ينفع تكون رجله اليمين
مش بالسنين
و لا بالهدوم متهربدة م الانفجار
طب بص شوف
حبة شظايا مضيعين شكل الوطن
كل اللى كان حلم انتهى
اصبح كفن
و ف عرف مين الموت يكون فى السوق تمن
يا كل عباد الوثن
يا غرقانين جوا الفتاوى المجرمة
من غير دليل
كدا مستحيل
الدنيا فيها نهار و ليل
و الشمس فى معاد الغروب بتروح تميل
عشان تقوم الصبح فيكون الشروق
بس انت مش عايز تفوق
و لا ترمى ف جنينة الامل بذرة حياة
عزفك تملي كله آه
هو انفجار جتت البشر طوق النجاة
افهم بقى شرع الاله
و ارجع و شوف طه النبى و افهم معاه
علم صحابته ما يقطعوش حتى الشجر
و لا يرمو ع الناس الحجر
حتى اللى كفرو ببعثته ما رضيش سيوفه تمسهم
قول حسهم
و اختار يكون اجمل مثل للمرحمة
قال كلمة ... عاشت مفحمة
فضلت على مر العصور بتشع نور
مش راح و فجر قنبلة تخلق قبور
افهم بقى
ان النبى ما امرش يوم نقتل برئ
و لا نرمى شوك وسط الطريق
باين عليك فعلا غريق
و شيطانك الفاجر غبى و ف قلبه نار
و انت عشان بتصدقه و تسرح وراه
فعلا .... حمار
فهمي على نصر