باقول و باعيد و ابص بعيد
و ابان باضحك و انا مجروح
عشان الليل بقى دايم
و نور الصبح مس بيبوح
وجع جايب وجع شايل
دموع ف عيون بشر خايفين
يسيل الدم حواليهم
يطرطش لونه ع الفساتين
شظايا بتخطف الضحكة
و تقتل طفل لسه برئ
بيتعلم حروف اسمه
و كان نفسه يشوف له طريق
ايدين الغدر و الخسة
باسم الدين بتخنق فيه
و تسرق فرحته منه
و بتصوب رصاص ف عنيه
بقينا ننكس الأعلام
و نعلنها حداد دايم
على اللي دمهم غطى
فطور الصبح للصايم
الهى رحمتك أوسع
من الهمّ اللي عشش فوق
و من إنسان قسى قلبه
بيقتل غدر مِيت مخلوق
و بيفجّر ف ناس امنة
و رايحة تصلى فى كنيسة
و بيولع ف اوطاننا
شايفنا غنيمة و فريسة
الهى مهما كان هو
فامرك بين كن .. فيكون
فطهر أرضنا منهم
و خلينا نعيش ف سكون
.....
فهمي علي نصر