وراح الحلم وانا لسه
هنا واقف ومستني
ألاقي الحلم..لكني :
بحس بصوت بيخطفني
كأنو من شرايني
بيندهلي وبيقوللي :
هنا عاشو بشر قبلك
بيتمنو..
وفضلو العمر يستنو
لحد ماماتو جواهم
وماتت فينا ذكراهم
نقول كانو هنا وماتو
واديك عايش هناك بينهم ..
ف أحضانهم
تموت..ميت
تعيش..ميت
مهوش فارق
كده مفارق،كده مفارق
هتبقى حكاية منسيه
وكل الناس هينسوها
مفيش أصلا حكاية
لو هيحكوها
يقولو إيه؟يقولو مات
عشان كان لسه مستني؟؟!!
صدى نفسي :
عتابك نار بتألمني..بتهزمني
بديت المح سنين عمري
بتسبقني..
وانا واقف ومستني
مفيش أحلام .. ومستني
مفيش حاجه
وبرضو لسه ..مستني
كأني برسم الأوهام
واعيش فيها
واجمـِّـل لون خطوط الوهم
وامحيها
وبرجع لما بمحى الوهم
برسم وهم من تاني
وبنسى إني مش عايش
وبنسى إني مستني
" أنا آسف على الحلم
اللي ضاع مني "
.....
معتز الراوي