ولما نام حلم بمنام
بإنه بيدبح الحيلة
وتاني يوم حلم تاني
وقام مغموم من الليلة
وتالت يوم حلم تالت
فقال مابيدنا حيلة
نده لابنه وقال يابني
ح أشاورك وانت جاوبنى
دا أمر الله نفذ فينا
وهو شاء كدا وقدر
فقال يا أبتي قوم بينا
ونفذ إللي بيه تؤمر
وخد يا والدي سكينك
وهات الحبل واربطني
بلاش عيني تشوف عينك
فنيمني علي بطني
وإدبح وانت بتكبر
بإذن الله أنا ها اصبر
فجاله الي عمل واعظ
وقاله أبوك خلاص خرف
دا ناوى يدبحك يابني
أبوك بجنون ح يتصرف
فقال إخسأ بقي وسيبني
دا أمر الله وها يصيبني
وراح راجمه سبع جمرات
هرب منه وراح لامه
ياهاجر إسماعيل ح يموت
وإبنك راح يسيل دمه
أبوه راح يدبحه ف سكوت
دا مجنون ولا دا ممسوس
يضيع إبنه لاجل كابوس؟
قالتله إخسأ بقي وسيبني
عشان ربي يهون إبني
وجت راجماه سبع جمرات
هرب منها وراح لأبوه
وقاله يا ابراهيم إعقل
وفك الواد وسيبه يعيش
تنام تحلم تقوم تقتل
دي مش رؤيا ف ماتضحيش
فقاله إخسأ بقي وسيبني
عشان ربي يهون إبني
وراح راجمه سبع جمرات
وبعد ما سن سكينة
وكبر للإله وسمي
وتل إبنه علي جبينه
وقال للرب أسلمنا
نده جبريل من السموات
ووياه كبش نازل بيه
وقال يا مصدق الرؤيات
فداك رب الذبيح وافديه
وأهداك كبش م الجنة
فقوم وادبح وضحي ليه
ومن يومها صبح عيدنا
نجيب خرفان وندبح فيه
وللي يحجوا بيت الله
بيقفوا في مني وعرفات
وفي المزدلفة بيروحوا
وبيزوروا تلات عقبات
ويرموا في تلات تيام
علي إبليس
سبع جمرات
.............
هشام الدشناوى