أنا إنسان ...بقلم الشاعر / أسامة عياد

 
يمكن أكون مهموم
يمكن أكون تعبان
يمكن أكون مجروح
يمكن أكون غلبان
يمكن أكون مدبوح
عن حالى مش ندمان
بعشق أنا النسيان
..................

الهم ما يتعد
ليه الجراح بتهد
كل الطرق تتسد
راضى أنا بالبعد
عن حالى مش ندمان
بعشق أنا النسيان
....................
عايم على الموجة
وبلف فى الهوجة
نفسى أكون نفسى
مش صورة بتعدى
دورى أصيل فى الفيلم
كومبارس دور الوهم
بانزف وقلبى يثور
لابس أنا الطرطور
ببكى بكل سرور
بضحك وانا مجبور
عن حالى مش ندمان
بعشق أنا النسيان
....................
يمكن لإنى جبان
يمكن أكون محبوس
جايز أكون سجان
يمكن أكون قاضى
يرمينى للقضبان
وأنينى بينادى
باصرخ وانا هادى
والصمت جوايه
صحى بقى البركان
عن حالى مش ندمان
بعشق أنا النسيان
.....................
يمكن أكون بحلم
يمكن يكون وسواس
يمكن أكون شجرة
وجذورها مالها أساس
يمكن أكون حجرة
معدومة الإحساس
يمكن أكون طاير
دايخ أنا حاير
وجناحى مش قادر
فى سمايا بيعافر
قبرى فى كل مكان
عن حالى مش ندمان
بعشق أنا النسيان
....................
قالوا أنا الإنسان
قلتلهم الحيوان
عايش على النسيان
عايز أكون إنسان
والحق مش هيبان
فى عتمة الدخان
والحق مش هيبان
فى عتمة الدخان
................
أسامة عياد