دارينا الدمعه بالضحكه
فدمعنا
و لوعنا معانا الحرف و المعني
صبح أعمي
بيتعكز علي شطره
قيتكعبل علي اللوعه
فينسي فرحه كات تايهه
ندا قلبي ماهيش سامعه
و مسموح الضلال فيها
و خوفنا الضلام بالضي
فاقسينا
و سمينا بإسم الحب ف اﻷول
و صلينا
نسينا نوضي إحساسنا
فضلينا
ختمنا بوهمنا عيونا
فخلينا
و لا ف مره
بكت للصدق ده عنينا
فرشنا الحب
و نسينا نقيد له شموع
نوينا الصبر
و لا مرة نوينا خشوع
اتاري النيه مش م القلب
مش خالصه
فخلصنا و لا خلصنا
و دورنا علي اﻹخلاص
يخلصنا
لقينا محل أوجاعنا
صبح مسموع
و بركة حبنا قلت
و حل مكانها ليل و دموع
سافرت لحد أيامك
في عز النار
و أديت الفروض كامله و انا بنهار
و صمت صيام عن الكلمه
و حلفت الحروف تبعد عن اﻷفكار
و حليت قلبي بالتقوي
و ربيته علي اﻷذكار
دعيت علي حبي يتبدد
و زدت الدعوة ف اﻷسحار
ما حيدتش ع القرار ساعه
اتاري هوانا كان بدعه
و دقة نبضه خداعه
و شهر الحب طول عمره
صيام القلب فيه ضلاله
........
جهاد زيادة