وباشتاق لك الاقيني ...
أقوم انا جري .
أجَهِز فنجانين قهوة
من البُن اللي بتحبيه .
وأستنى .. يعدي الوقت وتجيني
وأتخيل ...
كلامي معاكي عن بكرة الـ لسه ماجاش
ونتذكر سنين فاتت ..
وقطر العمر الـِ خطّانا وماستناش
وعن أحلام حلمناها وباتمناها تتحقق
وعن ضحكة ضحكناها وكات مـ القلب
وأول كلمة قلناها ..
انا وانتي في لحظة صدق .
وعن شوقي الـ جوا ضلوعي ومخبيه
وعن روحي الـ عشقاكي وشيفاكي
بتملي الكون بكل ما فيه .
وعن حبي الـ باين جوا في عيوني
ومش قادر عليكي اداريه
وأتذكر .. سؤالك ليا كالعادة ..
حبيبي بجد حبيتني ؟؟
أرد بشوق ..
أكيد جدااااااااا ..
أكيد طبعااااااا .. يا مجنونه .
باحبك حب لو حبه الحبيب لحبيب
يدوب الحب من حبه
باحبك حب .. واكل حب
شارب حب
لابس حب
راضع في الأساس من حب .
تردي عليا وتقولي ..حبيبي ليه بتخطفني ؟
وقبل ما ارد .. أفوق على رن تليفوني
أشوف أسمك .. أقوم مخطوف
وانا ملهوف ..
الف واطوف .. ما بين الحرف والتاني
يا سحراني ..
باحبك .. تحت أي ظروف
باحبك أيوه باعلنها ومش مكسوف ..
حبيبتي لو وحشتيني ..
بالاقيني وكالمعتاد.. بسرعة أمسك الصورة
وأحضنها واروح في النوم ..
وأتمنى اشوفك في المنام صدفه
وانا وانتي كمان مرة
نعيد القصة من تاني .. ومن تاني ..
أقوم انا جري
أجهز فنجانين قهوة
من البُن اللي بتحبيه
وأرجع تاني أستنى يعدي الوقت .. وتجيني .
____________
محمود السيد